Tuesday, August 21, 2012

සරුංගල්




අම්මෝ.. පෙනේද අරකී නිකන් පත්තිනි අම්මා වගේ... සුදට සුදේ ඇඳල..පුහ්.."

ඈතින් එන සඳමාලිව දැක්ක සූධී විහිලුවෙන් වගේ කිව්වා. අපේ සෙට් එකම හැරිලා බැලුවේ මොකක්ද මේ සූධී කියන "පත්තිනි අම්මා" ලුක් එක කියලා. 

"මොන පත්තිනි අම්මද බන්.. ගල් දෙකත් එළියේ දාගෙන.." අමා අවඥාවෙන් වගේ කීවා. සුදු පාට කොට සායකින් හා සුදු පාට ටී ෂර්ට් එකකින් සඳා ඇඟ වහගෙන ගිටියා. ඇඟ වහගෙන කියලා තමා එයාගේ ඇඳුම් වලට කියන්න වෙන්නේ ගොඩාක් දවසට. 

"උඹලාට මොකද බන් ඒකී කොහොම ඇඳත්? හරියට මුන්ගේ ගල් එළියේ වගේනේ කෑ ගහන්නේ.." සහන් ඉතින් කොහොමත් සඳගේ පැත්තට තමා හැමදාම. 

සඳා ලස්සනයි. ඇහට කනට පේන කෙල්ලෙක්. ඒත් අවුල තියෙන්නේ එයා වෙලාවකට ඕනේවටත් වඩා පෙන්නවා. 

සඳා කියන්නේ කොහොමත් කැම්පස් එකේ හොඳම ටොපික් එකක්. කොයි සෙට් එකෙත් ඒ ගැන කතා නොකරන කෙනෙක් නැ. සඳ අඳින ඇඳුම්.. සඳාගේ ඉණේයි පිටෙයි තියෙන පච්ච.. සඳාගේ වටේ ඉන්න කොල්ලෝ.. කෙල්ලො කොල්ලො වෙනසක් නැතුව මේවා ගැන කතා වෙනවා.. සඳාත් ඒක දන්නවා. ඒත් එච්චර ගානක් නැ.


"ම්ම්ම්...අනේ සංසාරේ කිව්වාලු..උඹලා ඉතින් කොහොමත් ඒකීගේ ඇඹරිල්ලට අහුවෙනවානේ.." මෙච්චර වෙලා කට වහගෙන හිටපු මල්කීත් කට ඇරියා.

අපේ සෙට් එකේ කෙල්ලො හතරදෙනයි කොල්ලෝ තුන්දෙනයි හැමදාම වලි දාගන්න ටොපික් එක තමා සඳා කියන්නේ. සහන් සඳගේ පැත්තේ.. ටිරාන් සඳාට විරුද්ධ පැත්තේ.. ලෝකිත දෙපැත්තටම නැ.. එතකොට සූධීයයි අමායි නම් තදබල ලෙස "සඳා විරෝධීන්".. මමයි මල්කීයි මධ්‍යස්තයි. ඔහොම තමා කට්ටිය බෙදෙන්නේ. 

"අනේ මේ උඹලා මේ මාව ගාවන්න එපා ඔය වේ* එක්ක..හොඳේ.. මට පෙන්නන බෑ ඕකියේ ඇඹරිල්ල.." ටිරාන් බෙරිහන් දෙන්න ගත්තා. 
"මොකෝ සුභා සද්දයක් නැත්තේ?" සහන්ට ඕනේ මාව සඳාගේ පැත්තට කතා කරවන්න. 
"සද්ද නෑනේ අපි ගාව කොහොමත්..වැඩ විතරයි මල්ලි.." මම හෙමිට කතාව මඟ අරින්න හැදුවා. 
"මේ අහපන් සහනයෝ.. තෝ ඔය ඕකී එක්ක නටන්න ලෑස්ති වෙන්න එපා.. ඕකීට දැන කොල්ලෝම නම් කියලා කී දෙනෙක්ද.." ටිරාන්ගේ සුපුරුදු දේශනාව. 

"නෑ බන්.. මේකයි..ඒ කෙල්ලට තාම ඇත්තට ආදරේ කරන කෙනෙක් සෙට් වෙලා නැ බන්..ඒකයි ඒකී ඔහොම නටන්නේ.." 

සහන් හැමදාම කියන්නේ සඳාට ලං වෙන කොල්ලෝ බලන්නේ එයා එක්ක බුදිය ගන්න විතරයි කියලා. එයාට ඇත්තටම ආදරේ කරන කොල්ලෙක් ජීවිතේට ලං වෙච්ච දවසට එයා හැදෙයි ලු..


සඳාගේ ජීවිතේ නූල කැඩිච්ච සරුංගලයක් වගේ. එහෙම තමා මට හිතෙන්නේ. එක දවසකට එක කොල්ලෙක්..ආයේ වෙන එකෙක්.. "අර උඹේ කොල්ලද බන්?" දවසක් කාර් එකකින් සඳාව බස්සලා ගිය ලස්සන කොල්ලෙක් දැකලා මන් ඇහුව්වා. "කොල්ලා.. පිස්සුද බන්.. ඌට කෙල්ලෙක් ඉන්නවා.." සඳා හයියෙන් හිනා වෙලා කිව්වා. ඉතින් උඹ ඌ එක්ක රවුන් ගහන්නේ ඇයි බන්?" මම රවුම් ගහන්නේ නැ සුභා..ඌ එනවා මාව හොයාගෙන.. එකම කෙල්ල එක්ක ඉඳලා කම්මැලි ඇති.." එක ඇහක් වහලා ඉඟි මරන ගමන් කිව්වා. එයාගේ ජීවිතේ හංගන්න හදන්නේත් නැ.. කවුරු හරි මොනා හරි කිව්වොත් "ඇයි උඹලට මොකද" කියලා අහන සයිස් එකට ඒකීට හිතේ හයියක් තියෙනවා. වෙලාවකට සහන් කියන කතාවත් ඇත්ත කියලත් හිතෙන්වා. ඇත්තටම ආදරේ කරන එකෙක් හම්බු වුනොත් එයාගේ ඔය සෙල්ලක්කාර ගති නැති වෙයි. 

"අනේ මේ.. ඒවායින් කමක් නැ.. උඹ එහෙම ලෑස්ති වෙන්න එපා ඔය උම්රාඕ ජාන් ව භාර ගන්න." සූධීට සහන් එක්ක කේන්තියි.

"අපොයි මම නම් කීය දුන්නත් ඕකී එක්ක නම් ඉන්නේ නැ.."
"කොහොමත් ඒකී උඹ ගාවට එන්නේ නැ.. ඔය බතල ඇඟ දැක්කාම කෙල්ලෙක් එයිද බන්.." සහනුයි ටිරානුයි සුපුරුදු වලිය. "හරි ඉතින් උඹ හිතන් ඉන්නේ උඹට රිතික් රොශන්ට වගේ බිල්ඩ් එකක් තියෙනවා කියලානේ..අනේ පල ගෙම්බො යන්න.."
"මන් රිතික් රොශන් වගේ නොවුනත් මට හයිට් එකයි බිල්ඩ් එකයි තියෙනවා තමා හිවලෝ.."

අනේ නවත්තපල්ලකෝ බන්.. හැමදාම සඳා ආවොත් උඹලා ඉවර වෙන්නේ ඔතනින්.." මෙච්චර වෙලා මුකුත් ම නොකියා හැමදේම අහගෙන බලාගෙන හිටපු ලෝකිත කිව්වා.


"අනේ මන්දා ලෝකිත.. මුන් දෙන්නටම පිස්සු.. නැත්නම්.."

"උන්ට විතරක් නෙවෙයි උඹලත් පිස්සු බන්.. " අමා කියාගෙන් ආපු දේ හරස් කරලා ලෝකිත හයියෙන් කිව්වා. ලෝකිතට කේන්ති යන්නේ නැ. අපි ඔක්කෝම ඇස් ලොකු කරගෙන බැලුවා. 

"ඔව්..උඹලා ඔක්කෝමට පිස්සු..උඹලට විතරක් නෙවෙයි මේකෙ ඉන්න හැම එකාටම පිස්සු. සඳා සඳා සඳා.. ඒ ඇරෙන්න උඹලට කතා කරන්න දෙයක් නැ. පින් දීපන් ඒ කෙල්ලට ඒකී උඹල කතා කරන්න දෙයක් හදලා දෙනවා.."ලෝකිත නැවතිල්ලක් නැතුවම කියවගෙන යනවා. 

"ආහ් මෙච්චර කල් ඒකීගේ මායාවෙන් බේරිලා හිටපු උඹත් ඒකීට වශී වුනාද බන්?" සූධී උපහාසයෙන් ඇහුව්වා. 

"මන් වශී වෙච්ච මගුලක් නෑ සූධී.. උඹලට තියෙන්නේ ඉරිසියාව. උඹට කොටට අඳින්න ආසයි.. උඹ ඒක දවසක් කිව්වා.ඒත් උඹලගේ සාම්ප්‍රදායික අම්මල උඹට එහම් අඳින්න දෙන්නේ නැ.. උඹ ඒකට කියන්නේ අපේ අම්මලා නම් අපිව ඔහොම හැදුවේ නැ කියලා.. පිලිගනිනි සූධී උඹට සඳාට වගේ නිදහස තිබ්බා නම් උඹත් ඔහොම තම.. 

අනිත් කෙනා උඹ අමා. උඹට හැමදාම සුදු වෙන්න කියලා රටේ නැති ඒවා මුණේ උලනවා.. කුරුලෑ අඩු වෙන්න කියලා ඔක්කෝම එලවළු ටික මූණේ තියාගන්නවා.එහෙම කරලත් උඹ තරහයි උඹට සඳා වගේ ලස්සන වෙන්න බැරි එකට.."ලෝකිත පේලියට අඟිල්ල දික් කරගෙන කියනවා. 

"සහන් උඹට ඔය කියන මහ ලොකු ආදරයක් නැ.. අවුල තියෙන්නේ උඹේ ප්‍රතිපත්ති එක්ක උඹ එහෙම කෙල්ලෝ එක්ක නිදාගන්නෙ නැ. ඒකයි උඹ ඔය ආදරේ ඉස්සරහට දාගෙන වැඩේ කරගන්න හදන්නේ..සඳා ඒක දන්නවා. ඒ නිසා තමා උඹ එක්ක යාළු වෙන්නෙ නැත්තේ. ඒකීට කොල්ලෙක් එක්ක යාළු වෙලා ඉන්න බැ කියලා ඒකීම දවසක් කිව්වා.

"අනික උඹත් ටිරාන්..මතක පළවෙනිම දවසේ උඹ ඒකීම දැක්කාම ආසාවේ බෑ කිව්වා. ඒත් දැන් උඹ දන්නවා ඒකී උඹට මලාට කැමති වෙන්නේ නැ කියල.."ටිරාන් හොරෙන් බිම බලාගත්තා. මල්කීයි මමයි බය වෙලා හිටියේ අපිට මොනවා කියයිද කියලා. 

"උඹලා දෙන්නා නම් ඒ තරම් කෑ නොගැහුව්වත් එදා සඳාගේ ඉණේයි පිටෙයි සමනල්ලු වහලා කියලා නම් උඩ පැන පැන හිටියා නේ?.. පිලිගනින් සුභා.. උඹව මන් ඉස්කෝලේ යන කාලේ ඉඳන් දන්නවා..උඹට ඕනේ තරුවක් උඹේ පිටේ කොටාගන්න. ඒත් උඹට ඒකට හයියක් නැ.. ඕක තමා උඹලට වෙලා තියෙන්නේ.. උඹලා ඒකේගේ ඒ ජීවිතේට ඉරිසියායි... ඒක දිහා බලාගෙන හූල්ලනවා.. අනේ අපිට බැරි මොකෝ කියලා..උඹලා කිව්වා හරි..ඒකී නූල කැඩිච්ච සරුංගලයක්.. ඒත් අපිත් සරුංගල්.. වෙනස තියෙන්නේ අපි තාම කොහෙට හරි ගැටහලා.. " 

කටහඬේ කිසිම ආවේගයක් නැතුව... හෙමිට ලෝකිත කිව්ව දේවල් අපේ ඔලු වලට වෙඩි තිබ්බා වගේ දැනුනා.. කට්ටියම කිසිම හාවක් හූවක් නැතුව ඔහේ බලාගෙන හිටියා.. 

"ඇත්තටම අපි ඉරිසියයිද බන්?" සූධීගේ කටහඬ ඈතින් වගේ මට ඇහෙනවා..මොකක්ද මන් කියන්නේ? මගේ යටි හිත නම් හරියටම උත්තරේ දන්නවා..





Post Comment

Tuesday, August 14, 2012

මගේ ත්‍රස්තවාදී සිතුවිලි...


හිතට මේ දවස් වල එච්චර හොඳ නෑ වගේ.. වෙන මුකුත් හින්දා නෙවෙයි. නරක සිතුවිලි පහල වෙනවා.. ත්‍රස්තවාදී ක්‍රියා වගේ ඒවා..අනේ මන්දා..මේවා බ්ලොග් වල ලියලා මාව හෙට සුදු වෑන් එකකින් උස්සයිද දන්නේ නැ..ඔන්න මට පහල වෙච්ච කඩාකප්පල්කාරී සිතුවිලි ටිකක් ඔයාලත් බලන්නකෝ..



හොඳට දිලිසෙන්න
සීරුවට මැදලා
කිරි කිරි පාටින් 
බැබලෙන වීදුරු ජනේල
ආසාවේ බෑ මට
තඩි ගලක් ගහලා
සළ සළාං වීදුරු
කෑලි හැලෙන හැටි
බලන්න..

අපේ අම්මාගේ
ලස්සනම පෝච්චිය
හෙමිට අත වද්දලා
බිමට වැටෙන හැටි
බලාගෙන ඉන්න
ඒ කෑලි අහුලා
ආයෙමත් අලවන්න
ආසාවේ බෑ මට
පෝච්චිය බිඳින්න...

බැල්කනියේ ගැට්ටේ
සීරුවට ඇවිදින
පොඩි පූස් නාම්ඹව
බිමට තල්ලු කරන්න
වතුර දාන හෝස් එකේ
තැනින් තැන හිල් විඳලා
වතුර විහිදෙනා හැටි
බලාගෙන ඉන්න

අනේ මට ආසයි...
ගොඩාක් ආසයි..

ඔන්න මම කිව්වා මගේ ත්‍රස්තවාදී සිතුවිලි එකක් දෙකක්.. මාව හෙට හතරවෙනි තට්ටුවට ගෙනිච්චොත් ඔයලා තමා ඔත්තුව දීලා තියෙන්නේ හරිද..

Post Comment

Sunday, August 12, 2012

පොත් ගන්න කලින් පෙර සූදානමක් - 2

මේ අර කලින් ලිස්ට් එකේ ඉතුරු කොටස.. ඒක බැලුවේ නැත්නම් ගිහින් බලන්නකෝ.

ඉන්දියානු හා බෙන්ගලි පරිවර්තන

12. මාවතේ ගීතය, අපරාජිත ජීවිතයක්, අපූගේ ලෝකය- මේ පොත් තුන එකම කතාවක කොටස් තුනක්. අපූර්වගේ ළමා කාලයේ සිට මැදිවිය දක්වා ජීවිත කතාව මෙයින් කියවෙනවා.. මේ පොත විශේශ වෙන්නේ අපූර්ව නිසාමයි.. අපූර්ව කියන්නේ එක්තරා විදිහක සංචාරකයෙක් කියන්න පුළුවන්..ජීවිතේ කොයිම වෙලාවක වත් එක තැනකට කොට වෙලා ඉන්න කැමති චරිතයක් නෙවෙයි. එයාට වැදගත් මුදල් වත් ගේ දොර ඉඩකඩම් නෙවෙයි. හිතේ නිදහස් හා සතුට. ඒ නිසා ජීවිතය අමුතු විදිහටකට විඳින මිනිහෙක්. චින්තා ලක්ෂ්මි සිංහ ආරච්චි ගේ පරිවර්තනයක්.මේ පොත් හිතට වදින්න එක හේතුවක් විදිහට පරිවර්තිකාවගේ හැකියාවත් දක්වන්න පුළුවන්.

13. අරණකට පෙම් බැඳ-  මේකත් චින්තා සිංහ ආරච්චිගේ පරිවර්තනයක්. අපි හැමදාම කියවන්නේ මිනිසෙක් කාන්තාවක් සමඟ පෙමින් බැඳුනු කතා..ඒත් මේ පොත කියවෙන්නේ සොබාදහම එක්ක පෙමින් බැඳුනු කතාවක්. මේක නම් අනිවාර්යයෙන්ම කියවන්න. සල්ලි වලට අරන් ලඟ තියාගත්තත් පාඩු නැ.මොක්ද හිත කලබල ඕනේ වෙලාවක මේ පොත කියෙව්වාම හිතට පුදුම නිදහසක් දැනෙනවා. විභුතීභූෂණ බන්දෝපාධ්‍ය නම් බංගලි කතුවරයාගේ පොතක්. [නම කිව්වා හරිද මන්දා..මතකෙන් ටයිප් කලේ.වැරදින් නම් නිවැරදි කරන්න.]

14. ගෝරා - රවීන්ද්‍රනාත් තාගෝර්ගේ නවකතාවක්. බොහොම අගේ ඇති පොතක්. මම මේක කියෙව්වේ මම 8 වසරේදි. ඒ කාලේ ඒ තරම් ම ඒ කතාව තේරුනේ නැ. මේ කතාව දේශපාලනය, හින්දු සමාජ ක්‍රමය හා මිනිස් හැඟිම් ගැන කෙරෙන බුද්ධිමත් සංවාද වලින් යුක්තය. ගෝරා තාගොර්ගේ විශිෂ්ඨතම කෘතියක් ලෙස සැලකෙනවා.
මේ පින්තුරේ නම් ගත්තේ බුකියේ "පොත් කියවන අය" ගෲප් එකෙන්.

15. ඉංග්‍රිසී ගුරුවරයා - ආර්.කේ.නාරායන්ගේ The English Teacher පොතේ පරිවර්තනය. තම බිරිඳගේ අකල් නික්මයාමෙන් පසු දරුවා සමඟ ගෙවන ජීවිතයත්..එසේම බිරිඳ මිය ගියද ඇය සෙවීම නතර නොකල මිනිසෙක් ගැන තමා මේ කතාවේ කියවෙන්නේ. අපූරු කතාවක්.

16. හලෝ හලෝ- චේතාන් භගත් ගේ ..පොතේ සිංහල පරිවර්තනය. කතාව තරමක වෙනස් එකක්. ඒ වගේම තමා සිංහල පරිවර්තනයේ රචනා ශෛලිය ගොඩාක් වෙනස්. බොහෝ දුරට කටවහරට සමාන ශෛලියක් තමා තියෙන්නේ. කෝල් සෙන්ටර් එකක වැඩ කරන තරුණ කණ්ඩායමක එක රැයක් තමා පොතින් කියවෙන්නේ. ඒ රැය එයාලගේ ජීවිතය වෙනස් කරපු රාත්‍රියක්. පොත ගන්න කලින් චුට්ටක් කියවලා බලන්න. කතාව ලස්සනයි.වෙනස් කතාවක්.


දැන් කියන්න යන්නේ මේ ලඟදී මම කියවපු සිංහල නවකතා කිහිපයක් ගැන.

17. ගමනක මුල නවකතා පෙළ- ගුණදාස අමරසේකරයන්ගේ නවකතා පෙලක්. මෙහි පොත් 7ක් තියෙනවා. ගමනක් මුල, ගම් දොරින් එළියට, ඉණි මඟේ ඉහළට, වංකගිරියක, යළි මඟ වෙත, දුරු රටක දුකට කිරියක, ගමනක් මැද. මේ කතාවේ කියවෙන්නේ 70-77 කාලයේ දේශපාලන, සමාජ බලවේග ගැන.

18. විලාසිනයක්ගේ ප්‍රේමය - සරත්චන්ද්‍ර මහත්තයාගේ පොතක් මේක. ජාතක කතාවක් පදනම් කරගෙන ඊට ජාතක කතාකරුට වඩා ගැඹුරු අපූරු විග්‍රයක් මේ කතාවෙන් දීලා තියෙනවා.
"ප්‍රේමය නම් අසෙණිය කුසුමක් වේ..
රිසි වූ කෙනෙකුට පූජා කරන්ට..
ලෝබ සිතින් තොර පිදුවමනා වේ..
පෙරළා ලබන්ට නොසිතා බිඳකුත්.."
මට මේ පොත ගන්න පෙළඹෙව්වේ ඔය පද පෙල.

19. කන්දක් සේමා- සුමිත්‍රා රාහුබද්ධගේ නවකතාවක්. දුප්පත්කම නිසා ජපන් ගොවියෙකු හා විවාහ වී සකුරා මල් දකින්නට ගොස් ගරා වැටුනු ගෙදරක තවත් එක් බිරිඳක් වූ ගැහැනියක්ගේ කතාවක්. මම මේ පොතට දෙන ටැග් ලයින් එක තමා ඒ..

20. මළගිය ඇත්තෝ හා මළවුන්ගේ අවුරුදුදා - සරත්චන්ද්‍රයන්ගේ තවත් අනර්ඝ නවකතා දෙකක්. ප්‍රේමයක්. දෙවොන්දරා සං හා නොරිකෝ සං. ආදරය හා විවාහය යනු දෙකකි. එකක් නොවේ. සිත් බැඳගත් නවකතා දෙකකි. මීට වඩා විස්තර කියා එහි ඇති අපූර්වත්වය නැති කිරිමට අදහස් නොකරමි. ඒත් කියවිය යුතුම පොත් දෙකකි.

21. අටවක පුත්තු - ලියනගේ අමරකීර්ති විසින් රචිත මේ පොත පහුගිය කාලේ ජ.වි.ප කොලාහල කාලය ලස්සනට විස්තර කර ඇත.

තව ඉංග්‍රිසි පොත් ලිස්ට් එකක් තියෙනවා.. ඒ ටික හෙට දාන්නම් හොඳේ.. ගිහින් එන්නම්.. ජය වේවා..

Post Comment

Saturday, August 11, 2012

පොත් ගන්න කලින් පෙර සූදානමක් - 1

ලබන මාසේ එන පොත් ප්‍රදර්ශනයට අපේ කට්ටිය ලෑස්ති වෙන්නේ ගිය අවුරුද්දෙ ඔක්තෝබර් වල ඉඳන් නේ...හා නැද්ද?? ඔන්න මම නම් එහෙමයි.. හික්ස්..ඒ නිසාම මම හිතුවා මම කියවලා තියෙන හොඳ පොත් කිහිපයක් ගැන කියන්න.. එතකොට ඉතින් පොත් කියවන්න  කැමති අයට තමන්ගේ පොත් ලිස්ට් එක හදාගන්න ඒක උදව් කරගන්නත් පුළුවන් නේ..
සමහර වෙලාවට අපිට පොත් ගන්න ගියාම එකපාරටම තෝරගන්න බැ.. ඒ නිසා ටිකක් වෙලා කියවලා බලන්න වෙනවා.. එකෙන් වෙන්නේ අපේ කාලයත් නාස්ති වෙනවා.. ඊට වඩා හොඳයි අපි හොඳ පොත් ටිකක් ගැන දැනගෙනම පොත් ගන්න යන එක.. ඒ නිසා තමා මම මේ ලිපිය දාන්න හිතුවේ... ඔයාලත් පුළුවන් ඔයාලා කියවලා තියෙනව හොඳ පොත් වල නම් කොමෙන්ටු විදිහට මේ ලිපියට යටින් දාන්න.. මොකද එතකොට ඒක මට වගේම මේ ලිපිය බලන්න එන අනිත් අයටත් වටින නිසා...

මම මුලින් ම බටහිර සාහිත්‍යයේ පරිවර්තන වලින් පටන් ගන්න හිතුවා.. 

1. ආගන්තුක රෝගියා - The English Patient කෘතියේ සිංහල පරිවර්තනය තමා මේ. Micheal Ondaatje නම් කතුවරයා ලාංකික සම්භවයක් තියෙන කැනඩා ජාතිකයෙක්. මේ පොත මම කියවලා ඉවර කලේ අද.[පොත් ගැන මීට වඩා ලොකු විස්තරයක් පස්සේ දාන්න තමා හිතාගෙන ඉන්නේ] යුද්ධයේ අතුරු කතාවක් කිව හැකි පොතක්. යුද්ධයේ තිබෙන නිසරු බව මනාව පෙන්වමින් ආදරය, මිත්‍රත්වය, කෝපය, ඉරිසියාව, සැකය..මේ සියල්ල කැටිකොට ගත් අපූරු කෘතියක්. [පරිවර්තක: කේ.ඒ.එන්.පෙරේරා]

2. සොෆීගේ ලෝකය - මේ පොත ගැන නම් මම කලින් විස්තරයක් ලිව්වානේ..මතක නැත්නම් ගිහින් බලන්නකෝ.....

3. ආදරණීය ගුරුතුමනි - Ricardo Braithwaite ගේ To sir with Love කෘතියේ සිංහල පරිවර්තනය. සමාජය විසින් බලාපොරොත්තු අත්හැර තිබූ තරුණ කණ්ඩායමකට යලි ජීවය පිඹින ගුරුවරයෙක් ගැන තමා මේ පොතේ තියෙන්නේ. සියලු දෙනාම අත්හැර දැමූ ජීවිත වලට යලි ආලෝකයක් ගේන්නේ මේ ගුරුතුමා.

4. මොන්ත ක්‍රිත්තෝ සිටුවරයා- Alexander Dumaගේ ඉතාමත් ජනප්‍රියම නවකතාවක් තමා මොන්ත ක්‍රිස්තො සිටුවරයා [The Count of Monte Cristo] කියන්නේ.මෙහි මුල් නවකතාව ප්‍රංශ බසින් ලියවුන්නක්.මෙහි සිංහල පරිවර්තනය වෙලුම් 6කින් යුක්තයි. අබිරහස් වලින් පිරි ලස්සන නවකතාවක්.

5.පුත්තු සහ පෙම්වත්තු - පෙරළිකාර නවකතා කලාවේ නවකතාකරුවෙකු වන D.H Lawrence විසින් රචිත මේ පොත [Sons and Lovers] මවක් හා පුතෙකු අතර උපතේ සිට මරණය තෙක් නොනැසී පවතින ඒ අරුම සම්බන්ධතාවය අලලා ලියැවුනක්.[පරිවර්තක: රත්නායක තිලකරත්න]

6. ලෝරා ඉන්ගල්ස් වයිල්ඩර් පොත් පෙළ- මේක නම් ගොඩාක්ම සුදුසු පාසල් වියේ ඉන්න නංගිලා මල්ලිලාට.. හැබැයි ඉතින් මම මේ ළඟදිත් ආයෙමත් මුල ඉඳන්ම මේ පොත් සෙට් එක කියෙව්වා. ලෝරා කුඩා දැරිවියකගේ සිට මවක දක්වා යන ඇගේ ජීවිත චාරිකාව මේ පොත් පෙළෙන් කියවෙනවා. අපි කිසිදා නොඇසූ කෑමබීම, උත්සව සිද්ධීන් බහුලය.[පරිවර්තක: ගංගා නිරෝෂිණි සුදුවැලිකන්ද]

7. ජැමෙයිකා තානායම - Daphne Du Maurieගේ Jamaica Inn කෘතිය චන්දන මෙන්ඩිස් විසින් මෙලෙස සිංහලය නඟා තියෙනවා. මුහුදු මංකොල්ලකාරයන් කණ්ඩායමක් ගැන කියවෙන මේ පොත ත්‍රාසය භීතිය කුතුහලය කැටිකොට ගත් නිර්මාණයක්. ඔන්න ටිකක් ඇඩ්වෙන්චරස් දේවල් වලට කැමති නම් මේක තමා පොත.. :D


රුසියානු පරිවර්තන 

8.කටු ඔටුනු - Svetlana Alliluyeva ගේ Only One Year කෘතිය සුමිත්‍රා රාහුබද්ධ විසින් සිංහලට පරිවර්තනය කර තිබෙනවා. මේක දේශපාලන කෘතියක් නොවේ. නමුත් මෙහි කතුවරිය ජෝසප් ස්ටාලින්ගේ එකම දියණිය වීම නිසා දේශපාලනය මෙහි ගෑවිම නොවැලැක්විය හැකිව තිබේ.නමුත් මෙහි කතාවට ඇය රුසියාවේ පිටවී ඇමරිකාවේ ස්ථිර පදිංචියට පැමිණීම දක්වා ඇය ගෙවූ අවුරුද්දක කාල සීමාව පාදක වෙලා තියෙනවා. රුසියානු ජීවිතය ගැන උනන්දු නම් කියවලා බලන්න.


ඊට පස්සේ තෝරගත්තේ අපේ ගොඩ දෙනෙක් කියවන මුස්ලිම් කාන්තාවන් ගැන ලියැවුනු පොත් කිහිපයක්.

9.දයාබර ඩාලිය - නෝමා කූරීගේ Forbidden Love කෘතියේ සිංහල පරිවර්තනය. ආදරය කිරීම වරදක් වුනු ලෝකයක ඇයට උරුම වුයේ මරණයයි..ඉතා සංවේදී කතා පුවතක් ඇතුලත් පොතක්.

10. මයාඩා- මේක ගැනත් මම කලින් ලොකු විස්තරයක් ලිව්වානේ..මෙතනින් බලන්නකො ඒක..

11. දෙවියන්ගේ අඩවිය- Betty Mahmoody ගේ Not without my daughter කියන කෘතියේ පරිවර්තනය. ඇමරිකාවේ ජීවත් වූ ඇය ආදරය නිසා සිරගත වෙනවා. ඇගේ දියණියත් සමඟ ඉරානයේ සිට යලි ඇමරිකාවට පලා යන ගමන මේ කතාවෙන් කියවෙනවා.
සිංහල පරිවර්තන වල පින්තූර නම් හොයාගන්න ටිකක් විතර අපහසු වුනා ඒ නිසා තමා ඉංග්‍රිසි පොත් වල පින්තූර දැම්මේ

ලිපිය දිග වුනා වගේ.. තව ලිස්ට් එකක්ම තියෙනවා දාන්න.. ඉන්දියානු හා බෙන්ගලි පරිවර්තන, ඉංග්‍රිසි පොත්, සිංහල පොත්..තව ගොඩායි..ඒ ටික අනිත් ලිපියේ දාන්නම්.. ඔයලා සමහර විට මේවා ඔක්කෝම වගේ කියවලා ඇති.. තව පොතුත් කියවලා ඇති..ඒවාත් කොමෙන්ටු වල දාන්න.. එතකොට මටත් මගේ මේ සැරේ ලිස්ට් එක හදාගන්න ලේසිනේ.. ගිහින් එන්නම් ඈ.. හිහි... ජය වේවා


Post Comment

Wednesday, August 8, 2012

සමනල් සිහිනය..




සිහින් කහ පාට ආලෝක කදම්භයක් ජනේලේ පුංචි සිදුරු අතරින් බේරිලා ඇවිත් මගේ පොත් මේසේ උඩට වැටිලා.. ඒ සඳ එළිය දිගේ ආපු ලස්සන සමනළයෙක් මේසේ උඩ නිදාගෙන හිටියා.. සමනල්ලු නිදාගන්නේ සඳ එළිය යටද?? ම්ම්ම්.. ලස්සන පාට පාට අත්තටු.. හරිම සනීප ඇති නේ.. සිනිඳු අත්තටු අල්ලලා බලන්න හිතුනත් සමනලයාට රිදෙයි කියලා හිතුන නිසා ඇල්ලුවේ නැ.. නිදහස් ජීවිතයක්.. යදම් නැති.. නිදහසේ පාවෙන සරළ ජීවිතයක්..
ආයේ හෙට උදේ ඉර එළිය වැටුනා ම ඌ යන්න යාවි..මම හිතුවා.. ඉර ඉළිය මැද්දෙන් ආකාසේ උඩට උඩට.. ඈතට..ඈතට පාවෙලා යන්න යාවි..මේ වගේ ජීවිතයක් මටත් ඇත්නම්.. ඒත් මට කොහෙද එච්චර වාසනාවක්.. මම ආයේ මගේ ඇඳට ගියා නිදාගන්න.. අඩුම ගානේ සඳ එළිය බිඳුවක් වත් මගේ ඇඳටත් වැටෙනවා නම්..එහෙම වෙන්නේ නැ.. සඳ එළියේ නිදහසේ නිදියන්න පුළුවන් නිදහස් ඇත්තන්ට විතරයි.. ප්‍රශන් වලින් ඕද්දල් වෙච්ච හිත තියෙන අපි වගේ ඈයෝ කවියෝ වෙලා ඒ සඳ එළිය දිහා බලාගෙන ඉන්නවා.. මම තවත් ගොඩාක් වෙලා ඒ සිහින් රීදී කදම්භය දිහා බලාගෙන හිටියා..


සිනිඳු සනීප
පාට පාට අත්තටු
විදහාගෙන දවසක
පියඹන්න ආකාසේ
වර්ණ මවනා
දේදුන්නට උඩින්
පාවෙලා යන්න
ඈතට ම ආතට
යදම් බිඳ දා
නිදහසේ ඉගිලෙන්න
සඳ නිදන සයනේ
අද්දර ම සැතපෙන්න
හිරු මවන දසුනේ
කොනකට වෙලා ඉන්න
නිදහසේ පාවෙන්න
ආසයි මටත් දවසක...

Post Comment

Sunday, August 5, 2012

~හිත~


අද වත් කලින් නිදාගන්නවා කියලා ඇඳට ගියාට ආයෙත් විනාඩි දහයකට පස්සේ නැගිටලා ලයිට් එක දාලා පෑනයි පොතකුයි අරගෙන මේසේ ගාවින් වාඩි වුණා. ඇයි මට මෙහෙම වෙලා තියෙන්නේ? මුළු දවසම ෆේස්බුක්, බ්ලොග්, චිත්‍රපටි, පොත් අතරේ සැරිසරලා ඇස් විතරක්ම නෙවෙයි හිතත් හෙම්බත් වෙලා ඇඳට ගියාම නින්ද ලඟට එන්නේ නැ.. නින්ද එන්නේ නැ නෙවෙයි.. නිදා ගන්න ඕනේ නැ.. රෑ එළි වෙනකම් ඇහැරලා ඉන්න ඕනේ...


උදේ පාන්දර නෙවෙයි දවල් 12ට නැගිට්ටත් මුලින් ම මතක් වෙන්නේ එකම දෙයක්.. එකම පුද්ගලයෙක්..රෑ කීයට නිදා ගන්න ගියත් නින්ද යන්නේ එකම දෙයක් ගැන හිතන සිතුවිල්ලත් එක්ක..සමහර දවසට නින්ද ගියත් ඒ එකම සිතුවිල්ල මාව දාලා යන්නේ නැ.. පියාගත් නෙත් යට හීනයක් වෙලා දැවටෙනවා...


හරිම පුදුමයි.. ජීවිතෙකින් කෙනෙක් අයින් වෙලා යන එක, එක තත්පරයකින් සිදුවෙන දෙයක්..ඒත් එහෙම අයින් වෙලා යන අය ගැන සිතුවිලි ඒ තරම් ලේසියෙන් අයින් වෙලා යන්නේ නැ..තත්පරෙන් තත්පරේ ඒ සිතුවිලි හිතට වද දෙනවා..දාහක් සිතුවිලි.. බිඳුණු සිතක් අස්සේ.. සැරින් සැරේ පාරනවා..ඇත්ත.. ඒ සිතිවිලි හරියට කැඩිච්ච වීදුරුවක් යලි යලිත් අතින් පිරිමදිනවා වගේ දෙයක්.. ඒ හැමසැරේකම හම තුවාල වෙලා ලේ ගලනවා.. තුවාලේ ආයේ ආයේ පෑරෙනවා.. 


මං එක බ්ලොග් එකක දැක්කා දුක හිතුනාම ඕනේම දෙයක් කරන්න.. ඒත් හැබැයි සින්දු නම් අහන්න එපා කියලා.. ඒක හරියටම හරි.. ඒත් ඉතින් පුදුමේ කියන්නේ මම කැමතිම සින්දු ඔක්කෝගෙන්ම මම වෙන් වෙලා හිටියත් ඒ සිතුවිලි නවත්තන්න බෑ..



නිදහසේ කල්පනා කරන හැම මොහොතකම එකම දෙයක්.. මනසින් අනාගතය දකිනවා..ඔබ හා මා සිටින අනාගතය..අතීතයේ සිටියා සේම..ආයෙත්.. ඒ එක හීනයක්.. ඇයි තව හීනයක් තියෙනවා.. වසර ගානකට පස්සේ හමුවීමක්.. හදිසියේ හමුවීමක්.. මම මොකක්ද කරන්නේ...මොනාද කියන්නේ.. කවදා කොහොම හමුවෙයිද.. දන්නේ නෑ මම.. ඒත් හීන දකිනවා.. 


යළිත් ඔබ මා සොයා එන හීනය.. ඇස් පිය නොපියා වුවත් මා දකින හීන.. ගැලවීමක් නෑ මට.. රුදුරු රකුසන් විලස මා රිද්දන මතකයන්..වධකයන් සේ මා කොනිත්ති ගහන අනාගත සිහින..
හෙට දවස කොහොම වෙයිද..ඔබ පමණකම මා දකින මගේ හෙට දවස.. ඔබ නැති බව දැන දැන මමගේ හෙට දවස තුළ ඔබම දකින..කොහොම වෙයිද මගේ හෙට දවස..


වෙන සිතුවිල්ලක් හිතට නො එන තරමටම හිත අරක් කරගත් ඔබ.. සත්තකින්ම පතනවා ඔබව සදාකාලයටම අමතක වෙන්න.. ආයේ කවදාවත්ම ඔබව සිහිනොවෙන්න..ඒත් තාම මට බැරි වුණා ඔබ අයින් කරන්න මතකයේ පෙට්ටගමින්..



හිස් අහස පුරාවට දකින ඔබ රුව මකාදමන්නට බැරි වුණා මට තාම..හමුවෙන හැම නෙතකම ඔබව නොසොයා ඉන්න බෑ මට තාම..ඇහෙන හැම හඬකම ඔබවම සොයනවා මම තාම..ඇයි..??? මම දන්නේ නෑ ඇයි..


මට එකම එක ප්‍රාර්ථනාවක් තියෙනවා.ඒ මට ඔබව අමතකම වේවා..!! සදාකාලයටම අමතකම වේවා..!!


එපා මට බිඳකුත්
සොඳුරු අතීතය වත්
බියකරු වර්තමානය වත්
එපා මට බිඳකුත්
මගේ මතකයන්..
මකාදමන්න මතකයන්
සදාකාලයටම මනසින්
සදාකාලයටම...




පසුසටහන: හිතට ගලාගෙන ආපු සිතුවිලි ඒ විදිහටම සටහන් කළා..හුදෙක්ම හිතේ නිදහස පිණිසය.. සාහිත්‍යයක් නැත..කලාවක් නැත..අනුකම්පාව අනවශ්‍යය.


Post Comment